पर्वतारोही कान्छा शेर्पाको घर गुगल अर्थमा

गुगल अर्थले आकर्षक सुविधाहरु थपेर आफूलाई नयाँ स्वरुपमा परिमार्जन गरेको छ । थपिएको नयाँ सुविधा ‘भोयजर’ मा संसारभरिका नक्सामा आधारित कथाहरुको संग्रह छ । प्रकृति, संस्कृति, इतिहास जस्ता कथाहरुको समूहमा विभिन्न चाखलाग्दो सन्दर्भ र रमणीय ठाउँहरु थ्रीडीमा नियाल्न सकिन्छ ।

भोयजरको ‘वर्ल्ड्स मोस्ट ड्रामाटिक माउन्टेन’ खण्डमा नेपालका सगरमाथा र आमादब्लम हिमालसहित विश्वका विभिन्न हिमालका दृश्य समेटिएका छन् । यस्तै, ‘दिस इज होम’ खण्डमा सोलुको नाम्चे बजारस्थित पर्वतारोही कान्छा शेर्पाको घर पनि समेटिएको छ । सर एडमन्ड हिलारी र तेन्जिङ नोर्गे शेर्पाले सन् १९५३ पहिलो पटक सगरमाथा आरोहण गर्दा कान्छा शेर्पा पनि सो आरोहण दलमा सहभागी थिए । उनी सो दलका एक मात्र जीवित सदस्य हुन् । उनको घरको बाहिरी स्वरुप देखिनुका साथै घरका कोठाभित्र डुल्न र उनको रोचक अनुभव सुन्न समेत सकिन्छ ।

यस खण्डमा हिमाली क्षेत्रका बासिन्दाहरुको बारेमा जानकारी लिन पनि सकिन्छ । ‘गुगल अर्थ आउटरिच’ ले सगरमाथा क्षेत्रका बासिन्दालाई समेट्न स्टोरीसाइकल र आप्पा शेर्पा फाउन्डेसनसँग साझेदारी गरेको हो । स्टोरीसाइकलका संस्थापक र संरक्षक सौरभ ढकालले ‘दिस इज होम’ परियोजनाले नेपाल र खुम्बु क्षेत्रको बारेमा विभिन्न पाटो बुझ्न सघाउने बताए । अहिले डेस्कटपमा मात्र चलाउन सकिने गुगल अर्थको परिमार्जित स्वरुप एक साताभित्रमा एन्ड्रोइड फोनको गुगल प्लेस्टोरमा पनि उपलब्ध हुने बताइएको छ । आईओसमा आउन भने केही समय लाग्नेछ ।

साभार : अनलाइन खबर

Click here to view the map!